Muzej "Stara poprjancarnja"
We Wósporku je móžno, jenički a najstarši w Europje hišće eksistowacy techniski muzej “Stara poprjancarnja” wopytać.
Muzej pokazuje socialno-ekonomiske wuwiće něhdy jara rozšěrjeneho rjemjesła, kotrež so dźensa hač na małe wuwzaća přez industriju a konditornje naruna. Twarjenje techniskeho muzeja přeńdźe po 250 lětach w swójbnym wobsydstwje do wobsydstwa města Wóspork. Nětko stara so spěchowanske towarstwo wo twarjenje a muzej.
Dnja 14.09.1941 so tehdyša poprjancarnja pod škit pomnikow staji a jako muzej wotewri. W lětach po wójnje słužeše twarjenje jako bydlenski dom a bu 1961 zaso jako muzej załožene a w lětach wot 1986 hač do 1990 so wobšěrnje saněrowaše. Jako připóznaće dósta za to w lěće 1992 wuznamjenjenje EUROPA NOSTRA.
Muzej “Stara poprjancarnja” je woprawdźe w starej poprjancarni při torhošću we Wósporku – při Via Regia. Tykowany dom z lěta 1617 je ze swojimi přez 400 lětnymi stawiznami jedne z najstaršich twarjenjow Wósporka a bě hač do 1937 bydlenje a dźěłowe městno Wósporkskich poprjancowych pjekarjow. W lěće 1941 wěnowaše posledni Wósporkski poprjancowy pjekar Paul Hermann Opitz swój dom městu Wóspork, kotrež jón přerjadowa na muzej. Za to česći jeho město hač do dźensnišeho z tym, zo na njeho stajnje spomina.
Muzej sposrědkuje hač do dźensnišeho awtentiske wašnje žiwjenja a dźěła wot 17.lětstotka hač do zažneho 20.lětstotka a před industrijne stawizny rjemjesła poprjancarjow.
Nimo našeje trajneje wustajeńcy skića Wam muzej dwě lětnje so wotměnjacej wosebitej wustajeńcy kaž tež pisane muzejo-pedagogiske poskitki za młodych a starych we wšitkich počasach. Za putnikow podłu ekumeniskeje putniskeje šćežki je muzej městnosć za kołkowanje.
Wjeselimy so na Waš wopyt!